Otandasymyz óziniń sońǵy kezdesýin 27 mamyrda AQSh-tyń Florıda shtatyndaǵy Boka Raton qalasynda ótkizgen bolatyn. Meksıkalyq boksshy Norberto Gonsalespen judyryqtasyp, tóreshilerdiń sheshimi boıynsha jeńiske jetken edi.
– Norberto Gonsales óte tájirıbeli boksshy. Boksta eshqashan aldyńdy boljaı almaısyń. Rıngte bir soqqy barlyǵyn sheship ketýi múmkin. Meksıkalyq boksshyǵa qarsy kezdesýde maǵan 12 raýnd tolyq judyryqtasyp, aldaǵy mańyzdy kezdesýler aldynda kúshimdi tekserip alý kerek boldy.
Ol EKSPO-2017 halyqaralyq kórmesi aıasynda Astanada ótetin kezdesýde amerıkalyq tanymal boksshy Djeıms Kırklendpen judyryqtasý múmkin. Qazirgi tańda boksshynyń promoýteri Nelson Lopes kelissózder júrgizip jatqanyn aıtady. «Kareramdaǵy eń mańyzdy kezdesýlerimniń birin óz elimde, óz jankúıerlerimniń aldynda ótkizý men úshin úlken jetistik. Maqsatym – jankúıerlerime tartysty boks keshin usyný jáne olardyń senimin aqtaý. Elordamyzda ótetin kelesi kezdesýim ońaıǵa soqpaıtyny anyq. О́ıtkeni, bul jolǵy qarsylasym álemdik deńgeıdegi boksshy bolmaq. Promoýterim qazirgi tańda amerıkalyq boksshy Djeıms Kırklendtiń komandasymen kelissóz júrgizip jatyr. Jaqyn kúnderi resmı málimdeme jasaıtyn bolamyz», deıdi Qanat Islam.
Al, Qanattyń promoýteri Astanadaǵy kezdesýde Mıgel Kottomen jekpe-jek uıymdastyrǵysy kelgenin aıtady. Biraq, boksshymen gonorar jaǵyna kelise almaǵan. «Mıgel Kotto jekpe-jek úshin bizden 12 mıllıon dollar surap jatyr. Bizde qazir ondaı qarjy jáne tańdaý da joq. Biraq, belbeýimizdi qorǵaý kerekpiz. Qazir reıtıng boıynsha Qanattan keıin turǵan kez kelgen boksshy onymen kezdesýge daıyn. Degenmen, biz álemdik tıtýldy ıelengimiz keledi», deıdi Nelson Lopes.
Qanat Islam elordada ótetin jekpe-jekke Astana jáne Almaty qalalarynda daıyndalady. Qanat buǵan deıingi jekpe-jekterine AQSh-ta jattyqqan bolatyn. Sondaı-aq, ol Almatyda da daıyndyq jumystaryn júrgizgen.
– Sońǵy jekpe-jegim AQSh-ta ótken soń daıyndyǵymdy sol jaqta ótkizdim. Qansha degenmen, AQSh – kásipqoı bokstyń otany ǵoı. Al, bul jolǵy kezdesýim Qazaqstanda ótetin bolǵandyqtan jattyǵýym da Astana jáne Almaty qalalarynda bolady. Aldaǵy ýaqytta AQSh-tan komandam keledi. Solarmen daıyndalatyn bolamyn.
Sonymen qatar, Qanat Islam óziniń qarsylastary týraly pikirin bildirdi.
– Meniń qarsylastarym týraly árkim ártúrli aıtyp jatady. О́z basym olardyń arasynda mynaý álsiz, mynaý myqty dep aıta almaımyn. Men úshin búginge deıin shyqqan qarsylasymnyń barlyǵy birdeı. Qazirgi jekpe-jekterim aldaǵy chempıondyq ataq úshin bolatyn kezdesýge baspaldaq ispetti. Eger qarsylas tańdaý meniń erkimde bolsa, erteń-aq chempıondyq belbeý úshin sharshy alańǵa shyǵar edim. Gennadıı Golovkınniń ózi kásipqoı boksta 15 jyl júrip, sońǵy jyldary úlken kezdesýler ótkizip jatyr. Sondyqtan, bári óz ýaqytymen bolatynyn aıtqym keledi.
Jýrnalıstermen kezdesý barysynda Qanat Islam 16 qyrkúıekte ótetin Gennadıı Golovkın men Saýl Alvares jekpe-jegine qatysty pikirin bildirdi. Qanattyń oıynsha, kezdesý tolyq 12 raýndqa sozylýy múmkin. «Bul kezdesýdi tek Qazaqstan nemese Meksıka emes, búkil álem jankúıerleri kútýde. Kezdesý Golovkınge ońaı soqpaıtynyn ishim sezedi. Menińshe, jekpe-jek 12 raýndqa sozylýy múmkin. Golovkınniń jeńisine senimen jáne oǵan tek qana sáttilik tileımin», deıdi Q.Islam.
Álı BITО́RE,
«Egemen Qazaqstan»